Unha xornada en pro da cooperación Ourense-Zamora
- A I Xornada de Cooperación entre as deputacións de Ourense e Zamora pon en valor as potencialidades das dúas provincias
- No apartado institucional os gobernos provinciais presentaron os programas de «Termalismo Social», por parte de Ourense, e o proxecto cultural «Las edades del Hombre», de Zamora
- Corenta empresas de ámbalas dúas provincias celebraron un encontro empresarial para poñer en común posibilidades de cooperación nos ámbitos termal e turístico e explorar vías de negocio
Manuel Baltar, onte, na inauguración da xornada de cooperación interprovincial.
O presidente da Deputación de Ourense, Manuel Baltar, e a presidenta da Deputación de Zamora, María Teresa Martín Pozo, inauguraron onte no Centro Cultural «Marcos Valcárcel» a «I Xornada de Cooperación da Rede Interprovincial Ourense-Zamora de comunicación e experiencia de xestión», un evento que ten como obxectivo poñer en valor as potencialidades e os proxectos estratéxicos de ámbolos dous territorios, coa implicación dos seus gobernos provinciais e coa celebración de encontros bilaterais entre empresas de Ourense e Zamora para abrir canles de colaboración e explorar vías de negocio.
Manuel Baltar explicou que esta iniciativa ten unha palabra clave que é a «cooperación», neste caso entre institucións provinciais, Ourense e Zamora, «que teñen claro que non só son gobernos que asisten técnica, económica e xuridicamente aos concellos, senón que teñen encomendada a defensa de un interese xeral de provincia».
O presidente da Deputación de Ourense dixo que ambas institucións crearon esta Rede Interprovincial «que ten que ver non só coa situación limítrofe das provincias senón, con cuestións que nos unen e compartimos, no ámbito do turismo cultural e gastronómico, e tamén na importancia de promover as riquezas patrimoniais e artísticas de ámbolos dous territorios, o que debe propiciar actuacións conxuntas».
Este encontro pretende «xerar riqueza sobre a base de acordos de colaboración que permitan tamén a interrelación entre empresarios de Ourense e de Zamora», destacou Manuel Baltar, lembrando neste sentido que os vindeiros 16 e 17 de xuño, «terá lugar un evento singular entre empresas de Ourense e de Estados Unidos, impulsado pola Deputación de Ourense: a misión comercial certificada polo goberno norteamericano, na que 15 empresas americanas manterán contactos con empresas da provincia de Ourense, relacionadas con sectores que favorezan sinerxias, estratexias de internacionalización e emprego na provincia ourensá».
No acto inaugural da xornada, Manuel Baltar remarcou a importancia do termalismo na provincia de Ourense, «segundo territorio de Europa con máis potencial termal», e tamén destacou o programa de «Termalismo Social», que puxo en marcha a Deputación de Ourense en colaboración con Renfe e que supuxo «unha innovación tanto na oferta de turismo de ocio e saúde como na xestión electrónica dos trámites que realizan as persoas interesadas neste programa de turismo termal».
María Teresa Martín Pozo e Manuel Baltar
Similitudes xeográficas
Esta primeira xornada de cooperación interprovincial enmárcase dentro da «Declaración das Provincias do Interior de Zamora e Ourense» que firmaron ambos presidentes o pasado ano, coa que se iniciaba unha senda de colaboración entre ambas provincias, que presentan grandes similitudes tanto xeográficas e poboacionais como de competitividade, o que deu lugar á creación da «Rede Interprovincial de Comunicación e Experiencias de Xestión», que hoxe celebra o seu primeiro encontro.
A presidenta da Deputación de Ourense destacou a importancia deste tipo de encontros «entre provincias que presentan moitas similitudes e que, polo tanto, nos podemos axudar mutuamente. Os dous piares da economía de ambas provincias están centrados no sector agroalimentario e no sector turístico, que é o que nos convoca hoxe aquí».
A Deputación de Zamora presentou o proxecto cultural de «Las edades del hombre» «e tamén estiveron presentes empresarios zamoranos do sector do turismo activo -importante na provincia de Zamora que conta coa Reserva da Biosfera Transfronteiriza máis grande de Europa-, e empresas de hostalería e do sector agroalimentario», salientou María Teresa Martín.
A xornada deu a coñecer proxectos estratéxicos de cada provincia. No caso de Ourense, o sector termal, un dos ámbitos de desenvolvemento estratéxico sobre o que a Deputación de Ourense leva impulsando nos últimos anos diferentes actuacións entre a que destaca o seu «Programa de Termalismo Social», como modelo de cooperación público-privado entre a administración provincial, os balnearios da provincia e Renfe. Pola súa banda, a Deputación de Zamora ten no seu patrimonio artístico-relixioso un gran potencial de desenvolvemento, focalizado este ano na Exposición de «Las Edades del Hombre», que ten ao municipio de Toro como sede, este ano dedicada á auga: AQVA.
A xornada tamén incluíu un encontro entre empresas de Ourense e Zamora (SpeedNetworking) do sector turístico, convocadas pola Cámara de Comercio de Ourense, no que se realizaron entrevistas bilaterais B2B dun máximo de 10 minutos cada unha, involucrando a todas as empresas participantes para favorecer o intercambio de propostas e explorar vías de colaboración entre elas. O obxectivo desta actuación é que as empresas poidan ampliar a súa rede de contactos e detectar potenciais colaboradores, sendo o inicio dun plan de colaboración e negocio entre empresas de ámbalas dúas provincias.
