Santiago Jaureguizar, premio «Xosé Aurelio Carracedo» de Periodismo
- Santiago Jaureguizar gaña o XXVI Premio de Periodismo «Xosé Aurelio Carracedo»
- O xurado outorga o galardón ao artigo publicado no xornal «El Progreso», titulado Os amigos do cadáver de Blanco Amor, destacando da obra «a súa calidade xornalística, o sentido crítico e a proposta de «actualizar», por medio dunha personaxe histórica da literatura galega, como é Blanco Amor, a crítica á situación social que vivimos nestes momentos»
- O premio, dotado con 3.000 € e diploma, entregarase o vindeiro 3 de maio, Día Internacional da Liberdade de Prensa, nun acto que se celebrará no Salón de Plenos da Deputación de Ourense
Reunión do xurado do Premio Carracedo de xornalismo
O xornalista Santiago Jaureguizar (Bilbao, 1965), redactor de Cultura do Xornal El Progreso, é o gañador do XXVI Premio de Periodismo «Xosé Aurelio Carracedo» na súa edición de 2016, dotado con 3.000 euros e diploma, un certame que anualmente convoca a Deputación de Ourense para honrar a memoria do xornalista ourensán que lle da nome ao premio, falecido en 1988.
O xurado, reunido hoxe no Centro Cultural «Marcos Valcárcel» da Deputación de Ourense, ditaminou conceder o galardón a Santiago Jaureguizar polo artigo xornalístico publicado no xornal «El Progreso», de Lugo, titulado Os amigos do cadáver de Blanco Amor, destacando da obra premiada «a calidade xornalística do artigo, o sentido crítico e a proposta de «actualizar», por medio dunha personaxe histórica da literatura galega, como é Eduardo Blanco Amor, a crítica á situación social que vivimos nestes momentos».
O xurado, que elixiu por maioría o traballo de Jaureguizar, considera que se trata dun artigo «moi ben estruturado e orixinal no seu plantexamento e enfoque».
Santiago Jaureguizar é redactor de Cultura do diario El Progreso de Lugo dende 1993. Coordina o suplemento cultural Táboa Redonda. Como xornalista foi galardoado cos premios «Manuel Reimóndez» e «Museo Provincial de Lugo». A súa faciana de narrador foi recoñecida cos galardóns «Lueiro Rey», «Xerais», «García Barros», «Terra de Melide» e «Caixa Galicia de Literatura Infantil e Xuvenil».
O xurado, presidido polo deputado provincial de Cultura, Manuel Doval Soto, estivo integrado por Xosé Ramón Pousa Estévez, decano da Facultade de Ciencias da Comunicación de Santiago de Compostela; Xosé Francisco Rodil Lombardía, membro da Comisión de Garantía da FAPE; Francisco González Sarria, vogal do Colexio Profesional de Xornalistas de Galicia, e Xosé Manuel Baamonde Silva, decano da Facultade de Ciencias Sociais e Comunicación de Pontevedra, actuando como secretario Fernando Rodríguez Méndez, responsable de Comunicación da Deputación de Ourense.
A entrega do premio terá lugar na Deputación de Ourense, nun acto que se celebrará no Salón de Plenos da institución provincial o día 3 de maio, Día Internacional da Liberdade de Prensa.
