Rogelio Martínez salienta a internacionalización do calendario ferial de Expourense durante 2014
A Fundación de Feiras e Exposicións de Ourense, Expourense, presentou hoxe o resumo de actividades organizadas durante o pasado ano. En total, no recinto feiral celebráronse 10 feiras, máis de 20 eventos que atraeron a máis de 128.800 visitantes, a 855 expositores e 350 relatores achagados dun total de 30 países.
O delegado territorial da Xunta en Ourense, Rogelio Martínez, participou na rolda de prensa e subliñou que o carácter internacional de tres feiras organizadas por Expourense marcou o seu calendario de actividades durante o 2014. A celebración de Termatalia Arxentina, Xantar e Funergal, posicionou ao recinto feiral ourensán entre os principais organizadores de eventos internacionais en España. Martínez indicou que grazas á cooperación público-privada, patente na composición do Padroado da Fundación, Expourense consolídase como unha plataforma que contribúe, a través da celebración de citas únicas, a fomentar a competitividade das empresas galegas e facilitar a creación de oportunidades de negocio internacionais, sobre todo en sectores estratéxicos como o termalismo, a gastronomía ou a industria funeraria.
O principal fito da actividade de Expourense en 2014 no relativo á internacionalización foi a celebración de Termatalia en Termas de Río Hondo, A Arxentina, entre o 1 e o 4
de outubro. Foi a segunda edición celebrada en América Latina logo de Termatalia Perú 2012, un evento que converteu a Expourense na primeira institución feiral española que organizaba un evento propio no estranxeiro, que tivo continuidade o ano pasado na Arxentina e que seguirá en 2016 coa celebración desta feira en México. Termatalia Arxentina consolidouse como un espazo de capacitación e formación que os profesionais aproveitaron para ampliar os seus coñecementos e especialización no referente ao turismo de saúde.
Rogelio Martínez incidiu que “con estas iniciativas, nas que a Fundación de Feiras e Exposicións de Ourense pon o seu esforzo e a súa ilusión cada día, Expourense contribuirá sen dúbida a lograr os obxectivos que Galicia se fixa na Estratexia de Internacionalización da Empresa Galega 2020. Unha folla de ruta coa que buscamos incrementar nun 25% o investimento estranxeiro en Galicia e o número de empresas exportadoras ata acadar as 8.000 nese horizonte”.
Rogelio Martínez felicitou ao equipo de Expourense polos resultados obtidos durante 2014 e animouno a seguir traballando para que “este recinto e os eventos que nel se organizan, sigan sendo motivo de orgullo para os galegos”.
