O único festival monográfico sobre as gaitas do mundo, declarado Festa de Interese Turístico de Galicia
- A «Xuntanza Internacional de Gaiteiros», declarada Festa de Interese Turístico de Galicia
- Trátase do único festival monográfico sobre as gaitas do mundo, que organiza a Deputación de Ourense en colaboración co Concello de Monterrei
Rafael Castro, José Luis Suárez, Xosé Lois Foxo e Rosendo Fernández
A «Xuntanza Internacional de Gaiteiros» vén de ser declarada Festa de Interese Turístico de Galicia pola Xunta de Galicia, tal e como recolle o nº 54 do Diario Oficial de Galicia do día 18 de marzo de 2016. A presentación desta declaración tivo lugar esta mañá no Pazo Provincial da Deputación de Ourense, onde estivo presente o vicepresidente da Deputación de Ourense, Rosendo Fernández; o director da Escola Provincial de Gaitas da Deputación, Xosé Lois Foxo; o alcalde do Concello de Monterrei, José Luis Suárez; e o axente de desenvolvemento do Concello de Monterrei, Rafael Castro.
A singularidade desta festa vén dada tanto polo lugar onde se celebra, así como por ser o único festival monográfico sobre as gaitas do mundo, tanto no ámbito galego coma estatal, recolle o DOG. Rosendo Fernández destacou que «este foro foi unha verdadeira escola e punto de encontro de gaiteiros e estudosos das gaitas de distintas culturas; neste sentido o evento compleméntase con ciclos de conferencias e coloquios de carácter científico».
Entre as actividades da Escola de Gaitas merece un lugar destacado a Xuntanza Internacional de Gaiteiros que nace paralela á posta en marcha da Escola. Este evento cultural celébrase dende o ano 1986 con carácter itinerante, celebrándose en distintas localidades da provincia de Ourense, ata o ano 2007 que se establece como sede permanente o Castelo de Monterrei.
O alcalde de Monterrei agradeceu á Deputación de Ourense, que a través da Escola Provincial de Gaitas, «celebre esta Xuntanza Internacional de Gaiteiros de maneira permanente desde o ano 2007 no Concello de Monterrei»,e tamén tivo palabras de agradecemento para «o mestre Xosé Lois Foxo por ser o precursor da idea desta declaración».
Desde o ano 2015 celébrase en dúas xornadas, fixándose a segunda delas na ponte romana de Ourense, pois «a primeira Xuntanza tivo lugar en 1986 nas festas da Ponte», sinalou o director da Escola Provincial de Gaitas. Este evento cultural contou coa participación «dos máis distinguidos gaiteiros do mundo, sendo un referente internacional neste momento», sinalou Xosé Lois Foxo.
A «Xuntanza Internacional de Gaiteiros» celebrará este ano a súa XXXI edición na que participarán «gaiteiros de Irlanda, Holanda, Francia, entre outros, e realizarase con maior grandeza se é posible», asegurou Xosé Lois Foxo. A declaración de Festa de Interese Turístico, supuxo que a Xunta de Galicia, lle conceda unha axuda de 3.000 euros ao concello de Monterrei para a súa celebración o que permitirá dar un salto cualitativo e cuantitativo ao evento, afirmou José Luis Suárez.
