O PP afirma que a folga de lixo cústalle 21.000 euros/día á cidade
O voceiro do grupo municipal do Partido Popular, Jaime Castiñeira, afirmou hoxe que a folga no servizo de limpeza e recollida de lixo de Lugo ten «un custo mínimo» para as arcas municipais de 21.000 euros, polo que «sae máis caro que a cidade estea sucia que mantela limpa».
Segundo Castiñeira, ese cálculo é o resultado de contabilizar «as horas extra da Policía Local», que ten que escoltar as brigadas alleas á concesión, así como dos «bombeiros e funcionarios», un gasto que se sumaría «ao custo de reposición do mobiliario urbano deteriorado» polas protestas e aos pagamentos «a Tragsa e a Urbaser».
O líder dos populares calcula que «os 39 días de folga xa lles custaron aos lucenses máis de 800.000 euros», aínda que aínda «falta por valorar o custo dos danos patrimoniais e materiais en edificios e vehículos», así como «a queima de colectores en distintos puntos da cidade».
Ademais, engade que «a maiores dos custos económicos», habería que «valorar o incalculable dano que o conflito provocou na imaxe de Lugo», así como as «consecuencias negativas que está supondo para a hostalaría e o comercio lucense»
