«O Mago Deimi» no Liceo de Ourense
O Liceo de Ourense convídavos a unha sesión matinal de maxia este vindeiro domingo, 2 de xaneiro. Chega, dende Ribadavia,e da man de Hermanager Producións, O Mago Deimi cun espectáculo dunha hora para sorprender a toda a familia.
O show empezará ás 12:00 h. e o custe da entrada será de 5 €, 3 € para as socias e os socios do Liceo.
Damián Varela é «O Mago Deimi»
Natural de Ribadavia (Ourense) tivo a afección da maxia dende cativo, unha paixón que lle está acompañando toda a vida e así se pode comprobar en calquera dos seus espectáculos.
Formación adquirida con grandes mestres e tamén de forma autodidacta para ir, co paso dos anos, adquirindo unha personalidade propia e deixando unha impronta característica nos seus espectáculos.
Damián Varela foi a máis cos anos e ademais de mellorar a técnica adquiriu unha empatía e unha forma de facer chegar a maxia moi humorística. Tal é así que de actuacións privadas ou eventos, pasando por actuacións en Salas e Teatros está metendo a cabeza xa no terreo audiovisual. Ten realizado interesantes colaboracións en programas da Televisión de Galicia como «Entre nós», «Máis Retranca» e incluso unha aparición na coñecida serie «Pazo de familia». Tamén gravou para a mesma canle o programa «Cámara Gags» da coñecida Produtora CTV.
