Lola Castro: «os veciños e veciñas do Courel non merecen este trato”
- A alcaldesa de Folgoso do Courel manifesta a súa “decepción” pola lentitude que a Deputación de Lugo está a amosar na construción da residencia de maiores da localidade
- Lola Castro mantivo hoxe unha xuntanza de traballo co responsable de Promoción Económica e Social na institución provincial para interesarse polos prazos que manexan para levar a cabo as obras
- A rexedora lamenta que a Deputación de Lugo “leve tanto tempo sen dar un só para a construción do inmoble, cando o Concello fixo todo o traballo que lle correspondía”
A alcaldesa do Concello de Folgoso do Courel, Lola Castro, mantivo onte luns unha xuntanza de traballo na Deputación de Lugo co responsable de Promoción Económica e Social, Pablo Rivera Capón, para coñecer os plans que o organismo provincial ten en relación coa residencia para persoas maiores que se vai construír na localidade, e que debería estar rematada xa no ano 2019.
Tras o encontro, solicitado pola rexedora de Folgoso do Courel, Lola Castro manifesta a súa “decepción” pola lentitude que Deputación de Lugo está a amosar na construción da residencia de maiores da localidade. “Recordeille ao deputado que o Concello fixo o traballo que lle correspondía, mentres que a Deputación leva moito tempo xa sen dar un só paso para que a construción da residencia sexa unha realidade”.
Tampouco onte na Deputación de Lugo foron capaces de fixar unha data para o inicio das obras nin para a entrada en funcionamento deste servizo.
O Concello fixo o seu traballo
Lola Castro recorda que o Goberno local levou a cabo a cesión dos terreos onde se vai levantar a residencia xa no ano 2019. En xaneiro deste mesmo ano aprobou a licenza para a construción da residencia e aprobou unha addenda ao convenio inicial, a segunda, “sen que a Deputación de Lugo dera ningún paso nesa dirección desde o ano 2018”.
Á vista destes datos e da “falta de feitos” por parte do Goberno Provincial, a rexedora cre que os veciños e veciñas do Courel “non merecen este trato”.
A alcaldesa lamenta a “falta de compromiso” da Deputación de Lugo cos veciños e veciñas do Concello de Folgoso do Courel e cunha infraestrutura e uns servizos que cada vez son máis necesarios e demandados.
A infraestrutura
A nova construción ocupará unha superficie de 780 metros cadrados no antigo colexio de Folgoso. O investimento previsto inicialmente para este proxecto ascenderá a 1,4 millóns de euros, dos que a Deputación achega 1,2 millóns e o Concello os 200.000 euros restantes.
