Galicia no festival brasileiro de Gramado

Turismo de Galicia participará esta fin de semana no Festival de Gramado, unha feira de carácter exclusivamente profesional que se celebra ao longo dos días 4 e 5 de novembro nesta cidade do Estado brasileiro de Río Grande do Sur. O certame está considerado un dos máis importantes centros de negocios turísticos do sur do Brasil, con influencia noutros países do cono sur americano: Uruguai, Paraguai e Arxentina.

Turismo de Galicia presentaralles, así, aos operadores turísticos do sur do Brasil a oferta turística xeral da Comunidade e do Camiño de Santiago, en particular, un dos produtos estrela neste mercado. Farao nun recinto de deseño de 24 metros cadrados no que os visitantes poderán achegarse aos produtos e servizos turísticos de Galicia, así como á historia e ás distintas rutas do Camiño de Santiago.

O obxectivo é dar a coñecer e potenciar a visita a outras zonas galegas despois da estancia en Santiago, xa que na última edición comprobouse que os visitantes tiñan moitas referencias do Camiño e da cidade de Santiago, pero descoñecemento do resto da oferta galega.

Peregrinos brasileiros
O longo do pasado ano, un total de 3.938 brasileiros fixeron o Camiño de Santiago, polo que supuxeron o 1,5% dos peregrinos totais que chegaron a Compostela en 2015, sendo Brasil o décimo país estranxeiro en orde de importancia segundo a procedencia. No que vai deste ano a cifra de peregrinos chegados do Brasil vai en aumento ao chegar xa un total de 4.107, superando, así, a cifra acadada no pasado ano.