Galicia é unha potencia na produción de castaña e aposta polo fomento do sector
- Ángeles Vázquez lembra que Galicia é unha potencia na produción de castaña e aposta por fomentar este sector
- A conselleira do Medio Rural en funcións visitou unha plantación de castiñeiros en Folgoso do Courel na que lembrou a aposta da Xunta polo cultivo destas árbores
- Na última campaña recolléronse en Galicia 20.000 toneladas deste froito
Castañas de Valdeorras
A conselleira do Medio Rural en funcións, Ángeles Vázquez, visitou hoxe unha plantación de castiñeiros no concello de Folgoso do Courel para poñer en valor esta produción forestal e agrícola na que Galicia é punteira a nivel estatal con máis de 20.000 toneladas de castañas na última campaña.
“A nosa comunidade é unha potencia na produción de castaña e temos que seguir apostando por este sector, xa que combina o aproveitamento forestal coa actividade agrícola a través da plantación de castiñeiros para froito”, sinalou Vázquez. A titular do Medio Rural sinalou que este ano a Xunta destinará 2,6 millóns de euros para a plantación de castiñeiros para froito e de cara aos próximos anos preténdese aumentar esta cifra.
Esta medida ten como obxectivo o fomento dos sistemas agroforestais e a súa preservación, o aproveitamento sostible dos soutos de castiñeiros, o mantemento da actividade agraria nas zonas rurais, e en particular nas áreas de montaña, e o apoio a un produto galego de calidade amparado pola Indicación Xeográfica Protexida (IXP) Castaña de Galicia.
En relación con este froito, co fin de poñelo en valor e ordenar a produción, estase traballando na creación da Mesa da Castaña como órgano responsable para o fomento, promoción e mellora dun produto forestal tan significativo e representativo da nosa comunidade. Dela formarán parte produtores, operadores, comercializadores, almacenistas, industrias de procesado e viveiristas, ademais de representantes da administración.
Este froito conta con Indicación Xeográfica Protexida dende o 2009 e a produción amparada baixo este selo disparouse nos últimos anos ao pasar de 5,6 toneladas en 2010 a 223,7 en 2015. En xeral, a produción de castaña en Galicia supuxo máis de 30 millóns de euros pagados a produtores que, á súa vez, xeran unha facturación anual superior aos 70 millóns de euros en comercialización unha vez transformados, o que supón un valor superior aos 100 millóns de euros.
O sector xera uns 500 postos de traballo directos e 800 indirectos, sen contar negocios como asadores de castaña, postos nos mercados, intermediarios…, algo que tamén resaltou a conselleira. Respecto á comercialización da castaña galega, faise un 50% en fresco, un 40% en primeira transformación e un 10% en segunda transformación.
Galicia conta cunha extensa superficie con presenza de castiñeiros. En concreto, ocupan unha superficie de 12.500 ha en masas puras e unhas 46.455 ha como especie secundaria en formacións mixtas. Ao mesmo tempo, a superficie de soutos produtivos de froito ascende aproximadamente a unhas 38.000 hectáreas.
Nos últimos anos fíxose un esforzo importante por recuperar estas formacións arbóreas, buscando a obtención dunha castaña de calidade con destino ao consumo directo ou á industria da transformación, ou ben mediante o aproveitamento da súa excelente madeira, perseguindo como obxectivos principais a diversificación na oferta de produtos e fixar poboación naquelas áreas onde xa existen castiñeiros ou pode repoboarse con devandita especie.
