A CIG inicia en Vigo campaña contra o peche de camas hospitais no verán
A CIG iniciou unha campaña de denuncia polo peche de camas hospitalarias na área sanitaria de Vigo durante o verán e para previr dos «problemas asistenciais» derivados, informou a central sindical nun comunicado.
Entre estes problemas destaca «a paralización» da actividade cirúrxica, o incremento das listas de espera, «a saturación» dos servizos de urxencia e un incremento da presión sobre os centros hospitalarios e sobre os seus profesionais para reducir o número de ingresos e o tempo de estadía media de hospitalización.
Na súa campaña, a CIG recalca que o Sergas dá prioridade ao «aforro», en consonancia coa «máxima» da Xunta de que «se non hai actividade, non hai gasto», e que o peche de camas «provocará, inevitablemente, o incremento do sufrimento» dos pacientes ao atrasar o seu acceso ás prestacións sanitarias.
Tamén fai fincapé en que se pechan camas «para non contratar persoal eventual» durante o verán, e faise eco da denuncia dos traballadores do servizo da UCI do hospital Meixoeiro sobre a pretensión do CHUVI de pechar desde o día 1 de xullo e até a fin do verán tres camas, coa conseguinte redución de persoal.
O que acontece é que esas camas non estiveron desocupadas en ningún momento, mais a redución de persoal xa se fixo efectiva, segundo recalca a CIG no seu comunicado.
O sindicato nacionalista esixe á xerencia da área sanitaria de Vigo que «abra as camas pechadas» e que «corrixa inmediatamente o recorte de persoal» na UCI do Meixoeiro.
