Fin da folga de lixo en Lugo
Os traballadores de Urbaser, a concesionaria do servizo de limpeza da cidade de Lugo, ratificaron en asemblea por unanimidade o preacordo ao que esta madrugada chegaron coa dirección da empresa e que permite acabar con case dous meses de folga na recollida de lixo na cidade da Muralla Romana.
Entre consignas como «Todos somos un», a asemblea de traballadores, que contou coa asistencia da práctica totalidade do equipo de Urbaser en Lugo, deu o seu visto bo ao acordo que permitirá que as rúas lucenses recobren a limpeza e a hixiene.
O acordo entre Urbaser e sindicatos alcanzouse en torno ás 4.00 horas da madrugada, tras case dez horas de negociación e supón a sinatura dun convenio colectivo de catro anos de vixencia que renova os dereitos sociais e laborais dos traballadores e anula os despedimentos dos 11 membros do comité de folga, aínda que estes se someten a unha sanción de 50 días de emprego e soldo, que cumprirán dende o inicio da folga, o pasado 9 de xuño.
