Un mal día teno calquera…
- Texto e imaxe: Xosé Manuel Fdez
Ese día no que a conexión che vai máis lenta que o cabalo do malo e pensas que estás só no mundo, ese día no que te sintes desprotexido e che entra un virus que afecta seriamente ao teu sistema operativo, ese día no que non te agrega ninguén ao Facebook nin che regalan Likes no Instagram…
Ese día no que esperas e-mails que che aleden a vida e non chega máis que SPAM á túa caixa do correo, ese día no que intentas eliminar todo o lixo emocional da túa papeleira de reciclaxe e un erro no sistema non cho permite, ese día no que te decatas de que tes moitos programas como ilusión 1.0, esperanza 1.0, optimismo 1.0 ou enerxía 1.0, desactualizados e tes que incorporar as versións máis recentes dos mesmos para mellorar as prestacións do teu PCerebral…
Ese mesmo día reflexionas, e chegas á conclusión de que un formateo do disco duro non che viría nada mal. Preséntaseche na cabeza a disxuntiva: “renovarse ou morrer” e pensas felizmente que o mellor será escoller o primeiro.
