Recollida de plásticos agrícolas nas Parroquias de Monforte
- Prevista para o vindeiro luns 23 de maio
- O plástico agrícola deberá depositarse durante hoxe sábado 21 e o domingo 22 de maio, dobrado e atado para facilitar o seu manexo, nos lugares habilitados para este fin, e non se deberán depositar outros tipos de plásticos que non sexan agrícolas
- O Alcalde destaca que “este servizo de recollida de plásticos agrícolas non ten ningún custe para os agricultores e os gandeiros e, ademais, contribúe de xeito
importante á conservación do medio ambiente. Trátase da décimo cuarta recollida deste tipo levamos a cabo dende o Concello de Monforte, logo de que a primeira recollida fora efectuada no ano 2008”
O Alcalde de Monforte, José Tomé Roca, informa de que o vindeiro luns 23 de maio vaise levar a cabo, como cada ano, a recollida de plásticos agrícolas nas parroquias do municipio. A data elixida para esta actuación coincide coa época na que os gandeiros e labregos necesitan desfacerse dun gran volume de plásticos, procedentes basicamente do ensilado de herba.
A recollida de plásticos agrícolas levarase a cabo dende primeira hora da mañá e ó longo de toda a xornada, nos lugares que a continuación se especifican:
- Marcelle (campo da festa)
- Gullade, Nocedas e Penela (saída das Nocedas a Gullade, antigo parque infantil)
- Vilamarín (campo da festa)
- Santa Mariña e Caneda (Campo da Pousa)
- Bascós, Chavaga e Sindrán (Local Social de Bascós)
- Reigada e Fontes (Praza Mourelo)
- Piñeira (Listo)
- A Parte e Valverde (Barrete Proveiros)
- Chao do Fabeiro (Campo da festa)
- Moreda, San Xoán, San Xulián e Seoane (Local social de San Xoán)
- Fiolleda (Carretera a Currelos)
- Baamorto (Campo de Fútbol)
O plástico agrícola deberá depositarse dobrado e atado, para facilitar o seu manexo e evitar a súa dispersión, os días previos ó da recollida -sábado 21 e domingo 22 de maio-, nos lugares anteriormente sinalados e habilitados para tal fin. Dende o Concello recórdase que non se deberán depositar outros tipos de plásticos que non sexan agrícolas.
O Alcalde precisa que “este servizo de recollida de plásticos agrícolas non ten ningún custe para os agricultores e gandeiros e, ademais, contribúe de xeito importante á conservación do medio ambiente. Trátase da décimo cuarta recollida deste tipo levamos a cabo dende o Concello de Monforte, logo de que a primeira recollida fora efectuada no ano 2008”.
O custo deste servizo, contratado coa empresa XIMA, será asumido exclusivamente polo Concello de Monforte. A recollida realizarase en tódalas parroquias que xeran plásticos e, dende alí, trasladaranse ata o punto de reciclaxe.
Os pedáneos das diferentes parroquias foron informados hai uns días polo propio Alcalde desta recollida de plásticos agrícolas e dos lugares e a data na que se vai realizar, resultando fundamental a súa colaboración, tal e como sucedera nas anteriores recollidas, para acadar unha óptima efectividade.
Anímase así ós labregos a participar na recollida e a achegar os plásticos agrícolas ós lugares indicados que lle queden máis próximos. Neste senso, cabe resaltar que as anteriores recollidas de plásticos agrícolas nas parroquias de Monforte tiveron unha gran resposta por parte de agricultores e gandeiros.
Por outra parte, tamén se recorda que outro xeito que se pode levar a cabo para a eliminación destes residuos agrícolas é achegalos ó Punto Limpo do Concello en calquera data do ano.
“Dende o Concello”, concluíu o Alcalde
queremos agradecer a interese dos labregos e gandeiros por eliminar correctamente este tipo de residuos e, deste xeito, contribuír ó coidado e mellora da nosa contorna ambiental. Así mesmo, agradecemos o traballo realizado polos pedáneos para difundir entre os seus veciños a existencia deste servizo
