Presentación do Concerto de Fin de Ano da Real Banda de Gaitas
- Concerto de Fin de Ano da Real Banda de Gaitas da Deputación, na Veracruz do Carballiño
- O evento, presentado onte no Pazo Provincial, terá lugar o vindeiro venres, 30 de decembro, ás 20.30 horas
Presentación do Concerto de Fin de Ano da Real Banda de Gaitas da Deputación de Ourense
A Real Banda de Gaitas da Deputación de Ourense despide ano co seu Concerto de Fin de Ano, que terá lugar no templo da Veracruz do Carballiño, o vindeiro venres, 30 de decembro, ás 20.30 horas. A presentación deste evento cultural tivo lugar onte no Pazo Provincial, acto no que participou o vicepresidente da Deputación de Ourense, Rosendo Fernández; o deputado provincial de Cultura, Manuel Doval; a deputada provincial, Teresa Cerdeira; o asesor de Cultura da Deputación, Aurelio Gómez Villar; o concelleiro de Cultura do Carballiño, Diego Fernández; e o director da Escola Provincial de Gaitas, Xosé Lois Foxo, e o párroco da Veracruz, José Benito Sieiro.
Rosendo Fernández destacou «o importante labor que realiza a Real Banda de Gaitas da Deputación na defensa das tradicións, pois é unha gran embaixadora da cultura de Ourense e de Galicia». Así mesmo, sinalou que a Real Banda de Gaitas recibiu este ano o premio nacional «Excelentia á cultura», «un galardón que recoñece os trinta anos de traxectoria da agrupación que durante este tempo levou o nome de Ourense e de Galicia e a nosa cultura e tradición musical aló por onde foi».
Xosé Lois Foxo explicou que este concerto é «o resumo do noso traballo durante este ano e tamén ten como obxectivo honrar nesta ocasión a Aurora Dapía Domínguez e Elpidio Justo Salgado, quen mantiveron durante 80 anos a tradición musical e son o paradigma dos músicos populares que transmiten ese saber». O concerto celébrase tamén en memoria de Arturo Vázquez González, gaiteiro de Vilamoure-Freás (Maside). «A súa viúva recollerá a medalla coa que a Real Banda honra aos músicos populares», dixo Foxo.
No concerto deste ano, a Real Banda de Gaitas interpretará unha obra de Ángel Custodio Santaballa, mestre da catedral de Mondoñedo, de finais do século XVIII; unha peza musical litúrxica creada nas catedrais de Galicia que recrearemos ese día con músicos e cantores», explicou Xosé Lois Foxo. Ademais da Real Banda, no concerto tamén actuarán Coral Polifónica do Casino do Carballiño e a Banda de Gaitas do Carballiño. En total, cos compoñentes de todas as agrupacións, participarán máis de cen músicos, que encherán de música, cultura e tradición, o templo da Veracruz.
No acto de hoxe tamén se presentou o CD/DVD nº 35 da Real Banda de Gaitas, que baixo o título: «Premio «Excelentia» á Cultura 2016″, reúne 23 cancións, entre as que se atopa o himno da Unión Ourensana Fútbol Club; Romance de Cego, dedicado a Manuel María; e pecha este traballo o himno da provincia de Ourense, Ourense no Solpor. A música, durante a presentación desta mañá, correu a cargo de Cantareiras da Real, que interpretaron un cántico de Nadal.
