Sétima edición de Megaxove, máis de 150 actividades esta ponte festiva en Expourense
- A Xunta colabora coa décimo sétima edición de Megaxove que Expourense acollerá esta ponte festiva
- A delegada territorial en Ourense, Marisol Díaz Mouteira, na rolda de prensa de presentación do certame salientou o carácter interxeracional do salón da Xuventude
- Este evento ofrece un completo programa de campionatos, exhibicións, torneos e obradoiros
A delegada territorial da Xunta en Ourense, Marisol Díaz Mouteira, participou hoxe na rolda de prensa de presentación da décimo sétima edición de Megaxove, Salón da Xuventude que, dende o 5 ata o 8 de decembro, ofrecerá máis de 150 actividades de lecer e deportivas e converterá a Expourense no punto de encontro da mocidade galega durante a ponte festiva da Constitución e onde miles de rapaces e rapazas participarán de forma activa.
Expositores e entidades colaboradoras con Megaxove elaboraron un completo programa de campionatos, exhibicións, torneos e obradoiros cuxo obxectivo non é só a diversión, senón o fomento de valores como o compañeirismo, a solidariedade cos máis desfavorecidos, o traballo en equipo, a tolerancia, a igualdade ou o respecto ao Medio Ambiente. “Valores, todos eles, que dende a Xunta de Galicia non podemos deixar de apoiar e estimular e, por iso, un ano máis, sumámonos a este proxecto” asegurou Díaz Mouteira.
Este ano como novidade impartirase un obradoiro de defensa persoal que incluirá a participación de psicológos e axentes se seguridade para previr e identificar casos de acoso escolar.
A delegada territorial salientou o carácter interxeracional do salón, no que pais e avós acompañan e comparten actividades cos máis pequenos.
Marisol Díaz referiuse, na súa intervención, á conmemoración do Día Internacional do Voluntariado que se celebra o día 5 de decembro, coincidindo coa apertura do certame. Aludiu ás preto de 900 asociacións que integran a Rede de Voluntariado Galego e asegurou que Megaxove é “o mellor escaparate para dar a coñecer as actividades relacionadas co lecer, a cultura ou o deporte que organizan durante o ano as distintas asociacións e clubs sen ánimo de lucro nas que están implicados miles de voluntarios e voluntarias de todo Galicia”.
As entidades participantes aproveitarán esta cita para promover a recollida de produtos alimentarios nunha nova edición da “Operación Quilo Megaxove” co obxectivo de destinalos ás familias máis desfavorecidas da provincia.
